Riaan Carsten – R.I.P.

9 Oktober 1965 – 2 Augustus 2008

Gisteroggend in die koudste ure, toe die nag op sy donkerste was, het jy ons gegroet, sommerso in jou slaap. Jy was ook een van die Anderstes, al het so min mense dit ooit besef. Net, jy het dit met drank verdoof. Daarom het ons jou soms misgekyk, die diepte wat jy in jou gedra het, verbygekyk. Nie altyd besef dat jy eintlik nie van hierdie wêreld hou nie.

Onthou jy destyds toe jy my in ‘n grap gevra het om met jou te trou, want dan sal jy ophou drink? Ek het jou in ‘n grap in jou dinges gestuur, maar ook geweet dat jy eintlik ernstig was. Jy het toe nooit getrou nie en op 42 was jy eintlik al amper die spreekwoordelike knorrige oujongkêrel.

Onthou jy hoe het ons jou ma geterg, net omdat sy tog so dierbaar tergbaar was? Ek en jy het haar siel uitgetrek tot dit net aan een lang flenter hang. Sy was een van die sout van die aarde en toe sy in 2003 groet, was jy stukkend. Jy was altyd haar “baby”, die jongste van julle drie broers.

Jy was die beste “mechanic” wat daar was, daar is nie ‘n motor wat jy nie kon regmaak nie. En jy was die enigste een wat ek ooit vertrou het om aan my motors te werk. Waarheen gaan ek nou en wie gaan ek ooit weer vertrou om die eerste keer reg te werk? Martin het vanaand gesê hy gaan die besigheid verkoop. Dis die einde van ‘n era, Riaan.

Jy het tog soms so kwaad geword vir jou boeta en gereeld gedreig jy gaan vroeg aftree, dan moet hy maar aansukkel sonder jou. Toe breek jou vroeg “aftree” heeltemal te vroeg aan.

Die Liefie sou komende Maandag sy motor vir jou gebring het en toe laat jy hom verlede Maandag weet hy moet kom, jy is reg vir hom en al die onderdele het gekom. Het jy dalk toe al vermoed dat jy nie hierdie Maandag sal sien nie?

En vanaand vertel hulle my dat jy reeds die afgelope maand al opgehou drink het. Het jy jou dalk onwetend voorberei vir die weggaan? Ten minste glo ek dat jy jou ma met ‘n nugter siel gaan ontmoet het. Sy sal tog so bly wees.

Ons het vanaand gesels oor julle twee en ons dink julle sit nou lekker iewers en skinder oor wat alles gebeur het vandat sy weg is. 😉

Weet een ding – jy het ons almal vandag in ons spore gestop en laat besin. Jou weggaan sny te na aan die been – jy is dan so oud soos ons! Jy moes nog hier gewees het. Jy moes vanaand saam gebraai het en ons weereens verpes het met jou terglustigheid.

Nou is jy weg en binnekort sal ons jou as ook Kleinmond toe neem.

Mooi loop, daar waar jy nou is, Riaan. Ons gaan jou mis.

Advertisements

17 Responses

  1. Mooi geskryf. Jammer Sonkind.

  2. Ek beaam RF. Sterkte!

  3. My innige simpatie Sonnie. Serkte!

  4. Ag nee, dis pynlik hartseer. Wat se^ mens op sulke tye? Dis so hartseer en so mooi gelyktydig.

  5. ((((((Sonkind))))))

  6. Dis hartseer. (((Sonkind)))

  7. (((Sonkind)))

  8. Sterkte vir julle (((Sonkind)))

  9. Dink aan julle, sterkte.

  10. Baie waar. Riaan was die ou wat eerste keer raak gevat het. Altyd ewe geduldig die een ding na ‘n ander gedoen het sodat dit reg is, baie min mechanics kan dit sê.

    Sy hande was hard en het niks gedink van die Paarl se koue winter nie. Die ou lyf maar altyd maklik onder motors ingegooi om te kyk waar die probleem is, wat klap so, wat raas so en of wat skuur so? Daadie vraag kon Riaan altyd maklik antwoord, hy was eerlikwaar ‘n motor dok van formaat.

    Mense het van ver-gekom sodat Riaan aan hulle motors kan aandag gee, welgedaan Riaan!!!

    So sal die mense jou onthou en daar waar jy dan nou is kan jy maar lekker rus, saam jou moeder.

    Dit is jammer dat jy so gou moes groet, wie gaan nou die res van die “family” op hulle tande laat byt? Jy gaan seker nie vir my daardie job gee nie?

    Salute Riaan!

  11. My innige simpatie. Sterkte.

  12. Doodgaan bly maar die afskakel van ‘n lig omdat die dag breek en die son opkom, soos ‘n ander reeds lank terug elders gesê het.

    Sterkte aan almal wie die persoon naby aan julle harte gedra het.

  13. So mooi geskryf. Die wonderlikse ding is darem mooi herinneringe. Waar mens selfs in die hartseerste tyd nog kan glimlag aan ‘n snaakse herinnering.

  14. Baie mooi geskryf! Klink of hy eintlik ‘n dierbare mens was! Dood maar baie seer, laat mens weer diep nadink oor baie dinge! Sterkte

  15. (((((Sonkind)))))

  16. Jammer om te hoor Sonkind.

    Baie mooi geskryf.

  17. jammer vir jou seer sonkind , sjoe sit ek en tjanjk hier vir jou mooi skryf, dit is nou iets wat ek nie kan doen nie ,maar ek tjank sommer vir my mammie wat oorlede is en sommer vir my skoonma wat my haar sonskynkind noem en sommer vir jou ook want jy is after all die sonkind hier op die web met jou klein hartjie en al , hope drukkies vir jou !

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out / Verander )

Twitter picture

Jy lewer kommentaar met jou rekening by Twitter. Log Out / Verander )

Facebook photo

Jy lewer kommentaar met jou rekening by Facebook. Log Out / Verander )

Google+ photo

Jy lewer kommentaar met jou rekening by Google+. Log Out / Verander )

Connecting to %s

%d bloggers like this: