Vir ‘n onbekende blonde man

Ek was skaars vyftien, nog in die tyd van die ou Suid-Afrika. Elke jaar het ek saam met my ouers na die gevangenes se konsert by die Victor Verster-gevangenis gaan luister. Desjare het ek nie geweet van Mandela nie, ook nie geweet hy sou baie jare later vrygelaat word deur einste hierdie gevangenis se hekke nie.

Hoekom die gevangenes toegelaat is om konsert te hou vir mense van buite en watter gevangenes almal toegelaat is om deel te neem, weet ek nie. Ek vermoed dat hulle sekerlik die geld ingesamel het vir een of ander goeie doel, of altans ek hoop so. En ek vermoed ook dat dit slegs die minimum sekuriteit gevangenes is wat toegelaat is om deel te neem aan die konsert, want hulle was beslis nie geboei nie en ek glo dat ontsnapkans in so ‘n opset seker maklik sou wees.

Ek was bloot te jonk om enigsins aan enige van hierdie detail aandag te gee. Om die konsert by te woon, was een van die lekker dinge wat ons elke jaar gedoen het, amper soos vakansie. Die vermaak was van besondere gehalte, maar selfs dit is slegs soos ek dit onthou uit ‘n tiener se oogpunt.

Wat ek egter tot vandag nog steeds duidelik voor my geestesoog sien, is die mooiste man wat ek in my dag des lewens ooit aanskou het. Geeneen van die ander het voor dit of daarna ooit weer so ‘n blywende indruk op my gemaak nie. Hy het met sy kitaar op die verhoog gekom en met ‘n engele stem begin gesing.

Dis ‘n paar dekades later en hy moet seker al bejaard wees, en steeds wonder ek oor hom. Hoekom was hy in die tronk en wat het daarna van hom geword? Waar is hy vandag? Ek sal seker tot my dooddag wonder oor hom. En tot my dooddag hom onthou as hierdie song speel.

Hierdie is vir jou, onbekende blonde man van lank gelede:

LOBO – I’D LOVE YOU TO WANT ME

Advertisements

Dag- of Nagmens?

Van kleintyd af moes ek gereeld hoor: “Komaan, komaan, staan op! Gisteraand was jy Kaatjie van die baan en vanoggend is jy dooie bobbejaan!”

EK IS NIE ‘N OGGENDMENS NIE! EK IS NIE ‘N OGGENDMENS NIE! EK IS NIE ‘N OGGENDMENS NIE!

Ek dink julle kry die prentjie 🙂

Ek is die Wilde Wragtig van die Weste vroegmore. Moenie vir my sê die oggendstond het goud in die mond nie – ek mag jou dalk net spoeg!

Ek is nie in ‘n beroep waar ek vroegaand tot laatnag kan werk nie, ek MOET soggens 6 uur opstaan en dis ook al “pushing my luck”. Maar van skooldae af het ek geleer om alles reg te sit in die aand, voor ek gaan slaap. Soggens is ek op robot ‘mode’.

Toe ek nog op skool was, was my skoolklere mooi netjies in volgorde neergesit, sodat ek toe oë kon aantrek in die oggend, nadat ek toe oë my tande en hare geborsel het, gelukkig darem elkeen met die regte borsel. Ja, moet eerder nie vra hoe lyk toe oë geborselde hare nie. Kleintyd het my ma dit gevleg terwyl ek gil met toe oë. Hoërskooltyd het ek dit kort genoeg laat knip sodat ek dit toe oë kon borsel en min of meer respektabelik kan lyk.

Winters het ek gehaat, want dan moes ek nog donkernag ook opstaan en baie meer klere toe oë aansukkel!

In elk geval, nadat ek darem aangetrek gekom het, het ek my oë net effens genoeg oopgemaak om my fiets te kry en skool toe te ry, sonder om te veel wakker te wees. Ek het dan ook gewoonlik met klokslag eers deur die hekke gejaag en die ry klas toe met ‘n splitsekonde betyds gehaal. Darem nooit laat nie, maar ook net op ‘n nerf na betyds. Omdat ek andersins redelik georganiseerd was, het ek nie te sleg gevaar tot ek hier teen 10 uur eers wakker geword het nie. Ek het die kuns om slapend wakker te lyk, vervolmaak!

Tweede pouse het die vaak my oë vetergaatjies getrek en het ek myself belowe; vanaand gaan ek vroeg slaap! “Famous last words.”  As dit kom aand word, dan is ek so wakker soos tien. Dan kan ek berge versit en wonderwerke verrig. Die energie borrel behoorlik deur my are. Ek sal ‘n marathon hardloop, my kaste begin regpak – enige iets en alles, behalwe slaap. As ek dan noodgedwonge bed toe gaan, lê ek en gaan op reise in my kop. Dit help min ek vertel myself ek moet nou slaap, want môre gaan ek weer doodmoeg wees. Aikona. Iewers kom haal die slaapfeetjies my darem, net om die volgende dag die patroon te herhaal.

Net na skool, is ek Weermag toe, Vroueleërkollege op George. WAT my besiel het, sal ek nooit weet nie. Behalwe vir die feit dat ek tot vandag toe nie ordentlik kan stryk nie, kan ek ook nie voor 10 in die oggend enige kos in my keel af kry nie. Teen die tyd dat ek behoorlik wakker was, was ons gewoonlik reeds op die paradegrond, besig om te dril. Omdat ek nie so vroeg kan eet nie, was ek in die begin menige dag naar gedril. Later het ek myself gedwing om soggens in my slapende toestand taai pap of harde eiers deur my keel te wurg, sodat ek net nie later omval nie. Gelukkig het ons nooit vroeg skietbaan toe gegaan nie, want ek kon nogal goed skiet en sou dalk net in my slapende toestand die 9 mil in die Korporaal se rigting gemik het.

In my huidige werk het niks verander nie. Ek sleep my slapende lyf soggens uit die bed, in my klere in, in my motor in en werk toe. Moenie met my praat nie, moenie vir my kyk nie, moenie my iets vra nie en moet verdomp asseblief ook veral nie voor my inry voor 10 uur in die oggend nie. Of dan ten minste nie voor ek 2 koppies koffie gedrink het nie – die wonder van kafeїen! Sommige oggende word ek verwonderd by my rekenaar wakker en wonder hoe ek daar gekom het, ten volle geklee en nogal met grimering aan. Ek verwag steeds soms om ‘n streep lipstiffie oor my oog te sien en dalk oogskadu oor my lippe.

Naweke is natuurlik ‘n fees. Dan kan ek slaap tot so laat ek wil en wakkerbly tot 3 uur in die oggend, as ek wil. Tussen 1 en 2 uur in die nag is ek op my kreatiefste. Gelukkig is die Liefie ook ‘n nagmens, anders het ons mekaar dalk al verloor tussen dag en nag 😆

Ek dink dit moet hel wees vir ‘n nagmens om met ‘n dagmens getroud te wees, of andersom. Ek wil hierdie glimlaggende oggendmense, wat soggens rondwip en tjirp soos kwikstertjies, soms gryp en verwoed rondpluk. Hoe kan hulle so vrolik wees so vroeg in die dag? En hoe kan hulle dit regkry om saam met die hoenders te gaan slaap?!  😈

Maar nou ja “sug”.

Is jy ‘n dagmens of ‘n nagmens?

I believe

So bietjie “Prep Talk”  😉

I Believe..
That you should always leave loved ones with loving words. It may be the last time you see them.

I Believe…
That you can do something in an instant that will give you heartache for life.

I Believe…
That you can keep going long after you think you can’t.

I Believe…
That we are responsible for what we do, no matter how we feel.

I Believe…
That either you control your attitude or it controls you.

I Believe…
That heroes are the people who do what has to be done when it needs to be done, regardless of the consequences.

I Believe…
That money is a lousy way of keeping score.

I Believe…
That sometimes the people you expect to kick you when you’re down, will be the ones to help you get back up.

I Believe…
That sometimes when I’m angry I have the right to be angry, but that doesn’t give me the right to be cruel.

I Believe…
That maturity has more to do with what types of experiences you’ve had and what you’ve learned from them and less to do with how many birthdays you’ve celebrated.

I Believe…
That it isn’t always enough, to be forgiven by others, sometimes, you have to learn to forgive yourself.

I Believe..
That no matter how bad your heart is broken the world doesn’t stop for your grief.

I Believe…
That our background and circumstances may have influenced who we are, but, we are responsible for who we become.

I Believe…
That you shouldn’t be so eager to find out a secret. It could change your life Forever.

I Believe…
Two people can look at the exact same thing and see something totally different.

I Believe…
That your life can be changed in a matter of hours by people who don’t even know you.

I Believe…
That credentials on the wall do not make you a decent human being.

I Believe…
That the people you care about most in life are taken from you too soon.

I Believe…
The happiest of people don’t necessarily have the best of everything; they just make the most of everything.

30 000 and counting

Ek het iewers tussen gister en nou die 30 000 merk oorgesteek 😉

Blog Stats

Total views: 30,054

Elke nuwe voertuig gaan mos eintlik vir sy eerste “MAJOR Service” op 30 000 km. Nou wonder ek, het hierdie blog (of sy eienaar 😈 ) dalk nou ‘n “major service” nodig?

Vir Jou – In Blou

Vrydagaand kuier ons by mense wat NET na Afrikaanse musiek luister. Dis ‘n lekker kuier, maar die musiek kry my soms onder. Ek het ‘n wye musieksmaak, wat ook Afrikaans insluit, maar nie NET dit nie.

Terwyl hulle rokkie-sokkie-bokkie in die braaikamer, met glase rooiwyn of brandewyn en coke, vat ek my Jack Daniels en dwaal na die TV kamer en kom daar op ‘n hele versameling ander Afrikaanse musiek af. Ek raak vergete aan die luister daar.

Ek kon nie anders as om hierdie woorde neer te skryf nie, dis ongelooflik mooi. Sy ander musiek is ‘n “acquired taste”, maar ek sal oor en oor hierna kan luister.

VIR JOU

(Jannie Moolman)

Vir jou wil ek ‘n huis hê, ‘n huis met ‘n leiklip vloer

‘n witgekalkte skoorsteen wat deur die rietdak loer

‘n okkerneuthout onderdeur wat kreun aan die skarnier

‘n donskombers om in te duur, ‘n kaggel en ‘n vuur

Die dae is droef soos druiwe, jou naam is soet soos mos

Die herfs is in die wingerd, die son in elke tros

Want die winters hier is wondbaar as die jaar se hitte kwyn

Die seisoen word oud en waardig, wat mos was word nou wyn

Vir jou wil ek ‘n bos hê waar jy dennenaalde ruik

Reen wat oor die berg kom en timmer teen die luik

En by die hek ‘n bloekom met sy takke in die wind

Hier in die koperledekant jou warm blou-oog kind

Want die dae is droef soos druiwe, jou naam is soet soos mos

Die herfs is in die wingerd, die son in elke tros

Want die winters hier is wondbaar as die jaar se hitte kwyn

Die seisoen word oud en waardig, wat mos was word nou wyn

Al maak ek hierdie versie eenvoudig net soos nou

Die wens bly tog maar net ‘n wens, die werklikheid verbrou

Die wens bly tog maar net ‘n wens, die werklikheid verbrou

Want die dae is droef soos druiwe, jou naam is soet soos mos

Die herfs is in die wingerd, die son in elke tros

Want die winters hier is wondbaar as die jaar se hitte kwyn

Die seisoen word oud en waardig, wat mos was word nou wyn

Maar die song wat my binne geslaan het, was hierdie een – ek MOES dit net hier verewig!

Ek hou van blou – Illse Roos

Daar’s berge in die Boland wat versadig is van blou

Hoe dieper jy die vlaktes in, hoe blouer word die blou

Die bloute van die verste berg herinner my aan jou

Hoe verder die verlede in, hoe meer word jy van nou

Ek hou van blou, ek hou van blou

Ek hou, ek hou, ek hou, ek hou van blou

Die hemel en die maan is blou

En als wat ek van jou onthou

Word jaar na jaar ‘n blouer blou

Ek het jou êrens op die tyd se kronkelpad verloor,

Net die vae blou van jou afwesigheid bly oor

Verlange help nie baie nie, nog minder help berou

Hoe meer van jou verlore raak, hoe meer wil ek behou

Ek hou van blou, ek hou van blou

Ek hou, ek hou, ek hou van blou

Die hemel en die see is blou

En als wat ek van jou wou

Word jaar na jaar ‘n blouer blou

Miskien is ver tog nie ‘n plek nie, verloor is dalk behou –

Jy was dalk nog altyd net ‘n afgeleë kleur, maar

Ek hou van blou, ek hou van blou

Ek hou, ek hou, ek hou, ek hou van blou

Die hemel en die maan is blou

En als wat ek van jou onthou

Word jaar na jaar ‘n blouer blou

Die hemel en die maan is blou

En als wat ek van jou onthou

Word jaar na jaar ‘n blouer blou

Wat is die ergste…

…om die een wat jy liefhet aan die dood te verloor, of aan die lewe te verloor?

As die een wat jy liefhet doodgaan, is dit erg. Jy is hartseer en dit vat dalk lank voor jy vrede met die persoon se dood maak, maar jy het altyd jou mooi en goeie herinneringe.

As jy die een wat jy liefhet aan die lewe verloor, (ander vrou / ander man / ander enigiets) wat het jy dan oor? Die mooi herinneringe gaan vir altyd besoedel wees met die wete dat jou geliefde nou iewers anders aan ander herinneringe bou, waaraan jy geen deel meer het nie.

Hoe lief moet mens iemand hê om tevrede te wees dat hy / sy gelukkig is, al is dit nie saam met jou nie? Watter soort liefde veroorsaak dat jy iemand eerder dood sal sien as gelukkig saam met iemand anders?

Daar is ‘n gelykenis in die Bybel, waar twee ma’s oor ‘n kind baklei het en Salomo ten einde raad voorgestel het dat hy die kind in twee kap, ‘n deel vir elke ma. Die regte ma het toe teruggestaan en gesê nee, die ander ma kan dan maar liewers die kind kry.

Dit is ware liefde. Onbaatsugtige liefde, waar die een wat jy liefhet se geluk belangriker is as jou eie.

Hoeveel van ons het so lief?

Sou jy die kind in twee laat kap het – figuurlik gesproke?

My Motto

Die Roos met die skerp dorings het beveel dat ek my persoonlike slagspreuk deel. Nou, as Doringrosie praat, dan luister ek, want sy is BAIE kwaai! 😈

My motto is: “As die lewe jou ‘n draaibal boul, slaan hom vir ‘n ses!”

Die lewe het my ook al meer as my deel taai klappe toegedien, maar ek het elke keer weer regop gekom, my klere afgestof, my tong uitgesteek, skewemond getrek en vir Ou Lewe gewys ek laat my nie onderkry nie, se dinges!

Daar bestaan nie so iets dat die lewe enigiemand iets skuld nie. Die lewe skuld my niks. My ouers skuld my niks, net omdat hulle my in die lewe gebring het nie. Met ‘niks’ bedoel ek materieel / finansieel. Natuurlik behoort hulle my lief te hê en my ‘n goeie opvoeding te gee, maar selfs dit is vir baie kinders nie ‘n waarborg nie.

Iewers langs die pad word ons almal groot, volwasse en dan moet ons verantwoordelikheid vir ons eie lewens aanvaar. Ek kan nie vir die res van my lewe op die rug ry van ‘n slegte kinderlewe nie. Ek kan nie heeltyd huil omdat die lewe my ‘n “raw deal” gegee het nie. Basta!

As jou pa jou ma geslaan het, leer daaruit. Moenie ‘n man trou wat jou slaan nie – jy behoort hulle te kan uitken. As jy ‘n seun is, moenie jou pa se foute herhaal en jou vrou slaan nie. Jy weet mos dis verdomp verkeerd!

As jou suster of broer die witbroodjie was, sorg dat jy dit nooit aan jou eie kinders doen nie, jy weet mos hoe dit voel. Wees vir al jou kinders ewe lief, al is dit miskien op verskillende maniere.

As jy gemolesteer is toe jy klein was, gaan sien ‘n professionele persoon om jou te help om dit te verwerk. Daar is vandag meer as genoeg plekke waar mens kan praat en hulp kry. Dis verskriklik dat so iets met enige kind kan gebeur, maar jy kan nie die res van jou lewe Jannie-jammergat wees daaroor nie. Dan gee jy jou aanrander / molesteerder ‘n magtige wapen in die hand, wat jou weerhou daarvan om jou eie potensiaal ten volle uit te leef. Jy leef in werklikheid dan glad nie, jy haal slegs asem en trap spore soos ‘n mens.

As jy jou werk verloor het en dit was nie jou skuld nie, is dit regtig baie erg. Maar moenie jou neus optrek vir enige werk nie. Wees bereid om enige iets (wettigs natuurlik) te doen. Om ‘n minder glansryke werk met minder betaling te doen, omdat dit al is wat daar op die oomblik beskikbaar is, is nie ‘n skande nie. Om by die huis te sit en glad nie te werk nie omdat jy te uitsoekerig is, is ‘n bleddie skande! Min geld per maand is beter as geen geld per maand.

Moenie ander mense manipuleer deur op die rug van jou slegte ervarings in die lewe te ry nie. Staan op, skud jouself reg en LEWE!

Miskien het die lewe my hard gemaak in die sin dat ek nie tyd het vir patetiese mense nie. Ek weet ons is nie almal ewe sterk nie en verwerk nie alles wat met ons gebeur op dieselfde manier nie. Maar om te sit en vergaan in jou slegte omstandighede, daaroor te kla en te kerm en nie jou eie arms uit jou moue te steek en iets daaraan te probeer doen nie – Aikona, daai ene werk nie vir my nie!