Die jaar loop uit

2007 lê op sy rug. Oormôre is dit 2008. Nog ‘n jaar daarmee heen. Elkeen van ons weet wat ons graag uit die nuwe jaar sal wil haal. Of dit gaan gebeur, sal ons nie nou al weet nie. Dalk is ons volgende jaar nog almal hier, dalk nie. Party van ons kan die toekoms voorspel, maar wil nie. Party wil, maar kan nie. My wens vir elkeen is net die beste vir 2008. En onthou dat die beste vir ons, ook nie altyd dit is wat ons sou wou gehad het nie!

Ons is nie amptelik met vakansie nie, maar het darem so met die vakansiedae weer bietjie ons eie omgewing herontdek.

‘Boxing Day’ is ons Waterfront toe en het sommer net by ‘n koffiewinkel gaan sit en ons verkyk aan die mense

Waterfront Java Jive

Die voëls is so mak, dat hulle kom krummels oppik waar mens sit en ek het dit reggekry om hierdie enetjie te vang – op kamera:

Voel by Waterfront

Later het ons al met die hawe langs geloop en oor ‘n trekbrug en sommer net bote gekyk

Sea Shuttle

En eendag as ek groot is, wil ek so een besit soos hier onder:

Maharani Yacht

en wegvaar en nooit weer terugkom nie!

En oor alles troon my geliefde berg, standvastig en ewig. Ek weet die Gautengers dink ons is behep met Tafelberg, maar ek is vir hierdie berg so lief, woorde kan dit nie reg beskryf nie. Dis vir my die teken dat ek by my huis is. Ek voel geborge.

Tafelberg

Basil se Japanese stiefpa is vir die vakansietyd in Suid-Afrika (hy kom altyd Desember en dan kry ons natuurlik magic geskenke wat hy saam bring uit anderland) en eergisteraand het hy ons uitgeneem vir sushi, by Cape Town Fishmarket in Somerset Mall. Dis ‘n pragtige plek en het blykbaar nou onlangs eers oopgemaak. Ek het lanklaas so baie sushi geëet en dit was vrek lekker. Ek wou al die bordjies wat ons opgeëet het, afneem, maar Basil het my gekeer. Die stapeltjie was nogal hoog!

CTFM Somerset Mall

En vandag het ons Franschhoek toe gery en toe uit op die pas na Villiersdorp. Dit is verskriklik mooi daar tussen die berge en fotos kan nie regtig reg laat geskied aan die berge se prag nie, maar ek het probeer!

Oppad na Villiersdorp

Die pad kronkel vreeslik en daar is seker omtrent 5 haarnaald draaie, maar die uitsig is onverbeterlik!

Buite Franschhoek

Vandag was daar geen Sondag blues nie, die lewe is net te mooi!

Viva 2008!!!

Advertisements

I wish I was…

Ma’s met pistole!

Kersdag het ons hele familie weer saam geëet, soos elke ander Kersfees. Dis die een dag van die jaar wat ek die familieding doen. Die res van die jaar hou ek my maar skaars by familie. Daar is ‘n gesegde wat sê mens moet familie een keer ‘n jaar op ‘n ou foto sien. Ek is nogal soms geneig om daarmee saam te stem. Dit sluit darem nou nie kinders in nie.

Hierdie Kersfees was die hele familie weer saam by my niggie se huis in die Paarl. Dis ‘n lekker sentrale ‘venue’ en groot genoeg vir ons almal. Elkeen bring een soort vleis en een soort slaai. Ons is ongeveer 30 mense so op Kersdag, so julle kan julle die klomp kos indink. En my ma maak ‘trifle’. Dit is haar spesialiteit en ek dink natuurlik nie daar is iemand wat dit so lekker maak soos sy nie.

Vanjaar het sy die Orley Whip vergeet en stuur my om geld uit haar handsak te gaan haal om te gaan Orley Whip koop. Die handsak lê een kant langs die rusbank en toe ek die beursie uithaal, vat ek iets kouds raak. Sowaar, dis haar .38 pistool! Ek besef natuurlik hoekom sy dit saam met haar dra, maar nou moet jy my ma ken om te weet dat dit ‘n absolute doellose aksie is.

My ma kan nie eers haar sleutels in haar handsak kry sonder haar leesbril nie. Dus moet sy eers vir haar bril rondvoel in haar handsak, die bril raakvat, dit opsit en dan haar sleutels soek. So stel jou nou voor sy wil enige iemand skiet wat haar aanval! Sy sal die rower, of wat ookal, eers moet vra om bietjie te wag, sy wil net gou eers haar bril soek, om op te sit om te kan sien waar om haar pistool te kry, voor sy die pistool kan uithaal en hom daarmee dreig of skiet! En dan moet sy nog onthou om die veiligheidsknip af te haal!

Toe ek haar voor stok kry oor die pistool in haar handsak en haar vertel dat die rowers dit sommer by haar gaan afvat en ook sommer byvoeg, vir ekstra skokwaarde: “Ma, enige aanvaller sou jou in elk geval al klaar verkrag het teen die tyd wat jy eendag jou pistool in die hande kry!”, slaan sy my mooi netjies vir ‘n ses.

Haar woorde; “Ag jong, wat sal ‘n ou verkragtinkie op my ouderdom tog nou saak maak! En buitendien, skiet hulle my nou met my eie pistool, dan was dit nou maar seker my tyd, ne.”

Ek was vir ‘n oomblik stom en natuurlik was sy nie ernstig nie, maar sy het die rondte gewen. Almal het uitgebars van die lag. Ek dink nog steeds nie sy is baie wys of verantwoordelik om die pistool so saam te dra nie, maar nou ja. So hardkoppig soos wat sy is, sal ek nie hond haaraf maak om haar anders te oortuig nie. Ten minste weet ek sy KAN skiet, dis nou net ‘n kwessie van die ding in die hande kry om mee te skiet!

Ou Kersaand

Buite Suid-Afrika se grense!

Hierdie is spesiaal vir julle wat in anderland is:

http://media.putfile.com/Take-me-Home-38

Kom Huis Toe!

Amper Kersfees

Ek loop in die winkelsentrums en ek sien die tekens oral – nog ‘n Kersfees is hier. Daar is nie net meer Kersvaders wat rondloop nie, daar is nou ook mensekinders met engele vlerke. Ek het vandag vir ‘n oomblik, toe ek uit die parkeer arkade met die roltrap bo in die sentrum kom, gedink ek het dalkies in die hemel beland, want reg voor my is toe twee pare groot, spierwit vlerke. Gelukkig het die illusie net ‘n oomblik geduur, want toe draai hulle om en ek sien dis net gewone mensekinders, met aangeplakte vlerke! 😆

Daar is 5 slapies oor, dan is dit Kersfees. Soos die kat, kom Kersfees weer. Elke jaar. En nuwe jaar ook. Mens maak planne en het voornemens en voor jy jou oë uitvee, is nog ‘n jaar op die naat van sy rug en het jy nie ‘n kwart van jou goeie voornemens uitgevoer nie. Maar somtyds bring ‘n nuwe jaar vir mense nuwe vreugde en nuwe vriende.

Toe ek in Maart met my blog begin het, het ek nooit kon droom ek sou so ‘n rykdom van inligting en interessante mense hier raaklees nie. En nou voel dit asof ek party maar altyd geken het. Mense sonder ‘n regtige gesig, maar nogtans mense wat op ‘n manier onder mens se vel ingekruip het. Waarsonder ek my nie meer ‘n dag kan voorstel nie. Waaroor ek wonder as hulle vir ‘n ruk stil raak en niks skryf nie. Elkeen het my horison verbreed op sy / haar eie manier.

Adam hou als dop met sy Blou Oog en tussen ons dwaal ‘n Tier. In ‘n verre land spoeg die Wit Drakie vuur, terwyl Karen sit en dink en droom. En by sy koffietafel sit ons Doom. In Korea is ‘n Boer in Ballingskap en by Bamboes kry mens darem altyd ‘n grap. Daar is ‘n Rivier Sonder Einde, met kort om die draai die Rus wat Salig Is. By Platterfuss gaan dit soms woes, maar hopelik het die Wingerdman met haar ‘n plan. DaMario push sy luck, terwyl Gormendizer sy vurige kitaar in plug. Vokof soek Skoor, en die Gestorwe Soldaat kan met woorde toor. Daar’s ‘n Feetjieland, Rene speel in die Woestynsand en Corli werk by die koerant. Anja se kop is oop, met Chris se kop op ‘n blok. Jo-ann staan op die seepkissie en Gedagteman vang ‘n vissie. Stoutsus en Flippa is ons skewe paar en Rustig van Onrustig is ook daar. Boendoe bash in Angola rond en daar’s Vlermuis en Kat, maar nie ‘n hond. Mag Kruidjie bly Roer en Ding bly Boer.

En nou het my power digkuns 😈 heeltemal opgedroog, maar ek het nie vergeet van Jaco en Krista, Dellie se dinge, Elektriese Orgidee, Nelba, onse Reverend, die PienkZuit,  kranksinnige Anne, Kyker met sy mooi fotos en Machiel en Jan in Nederland.

By elkeen het ek in die jaar wat verby is op een of ander stadium iets gelees en iets geleer.

Geseënde Kersfees vir julle almal!

Langebaan-Paternoster-Jacobsbaai

Gister sou ons gaan visvang, maar toe reen die visvang dag uit. Vir die eerste keer was ek nogal bly dit het gereen, want toe ry ons sommer net soos die pad ons vat en ons sien weer hoe mooi is die Weskus. Hier is ‘n paar fotos.

[rockyou id=95738791&w=450&h=336]