Mislik

Die mis wil nie lig nie en die son wil nie skyn nie. Ek werk vandag by die huis, want my rekenaar by die werk het besluit hy vat langnaweek (of dalk is die rekenaar ‘n ‘sy’). Ek is mislik en ek verlang na mense wat ek nie ken nie.

Net waar ek gaan

is ‘n pad voor my oop

Wat skerp uit my oë soos ‘n litteken loop.

Hoe die dag ook verblou

of rooikam om my

Ek volg net my hartseer

en die naambord is jy.

Dankie tog, more is Vrydag!

 

Dankie vir Comments; Blog is verslawend en my 10 Hoekoms?

Toe ek my blog begin het, het ek gedink niemand sal my eers opsoek nie, en nou het julle my dag gemaak.

Martin, die Kaap is mooi en ek sal NOOIT weer hier weggaan nie, maar Transvaal het beter weer.

Jaco, kom bly hier, al is dit koud en mislik en nat, verruil ek dit nooit ooit weer nie. Het lank terug, in my vorige lewe, ‘n klompie jare in die Transvaal gebly, vandag se Mpumalanga, maar die verlange Kaap toe was maar altyd soos ‘n steekpyn in my lyf. Vandag raak ek effens benoud as ek net oor Du Toitskloof gaan. Hierdie is my hartland, my huis, al speel die Stormers soos die hond se dinges en al reën dit my mal.

boerinballingskap – waarheen is jy verban? Kokkewiet en oopkop, ook dankie vir die draai maak hier, hoop julle kom weer.

Dis nou ‘n uitgemaakte saak vir my – blog is verslawend. Ek blog as ek kans kry by die werk en as ek huis toe kom en werk saambring, dan blog ek op die ou einde by die huis ook en los die werk vir more. Scary, ne!

Mens kry mos gereeld sulke lysies van 10. 10 Steps to a better life, 10 Ways to leave your lover, ensovoorts, ensovoorts. Ek klim nou ook op die lawaaiwa en ek het 10 hoekoms? En omdat ek ‘n broertjie dood het aan veralgemening, vra ek sommer by voorbaat om verskoning as ek iets hier noem wat dalk iemand hier raak, ek weet almal is nie skuldig nie.

1. Hoekom hou klein, kort mans so daarvan om ‘n 4×4 voertuig te besit / bestuur. Laat dit hulle groter voel?

2. Hoekom is mense wat VW Golfs, veral die GTi soort, so vrek arrogant? Kry mens ‘n lisensie vir arrogansie saam met jou registrasie papiere as jy ‘n VW Golf koop?

3. Hoekom ‘tip’ rokers hulle as by hul vensters uit? Na die beste van my wete het elke fabrikaat voertuig ‘n asbakkie in. Glo my, ek het niks teen rokers nie, ek dink selfs ons rookwette is effe belaglik. Ek wonder maar net.

4. Hoekom se mens eers: “Ek wil nou nie skinder nie, maar…” presies net voor hulle wel begin skinder.

5. Hoekom dink almal blondines is dom? (Vir die rekord, ek het donker hare). Uit ondervinding het ek agtergekom die eintlike dom blondines is die donkerkoppe wat hul hare blond gekleur het!

6. Hoekom kan meeste ma’s nie “let go” as dit by hulle seuns kom nie en is hulle sulke bitches teenoor hul skoondogters?

7. Hoekom het mens net een lewe en weet jy eers regtig waaroor alles gaan as die beste deel van jou lewe amper verby is?

8. Hoekom gaan goeie mense jonk dood en die slegtes bly lewe tot lank verby hulle “sell by date”?

9. Hoekom het slegte ouers kinders en die wat goeie ouers sou wees, kan nie kinders hê nie?

10. Hoekom sleep die tyd as mens moet werk, maar hardloop dit weg as mens lekker dinge doen?

Wat is die verskil tussen Waarom en Hoekom?

Lekker Woensdag vir julle – die week is halfpad!

Sneeu soek, Bungi jump, ens.

Sondag oggend half nege is ons by die huis weg, op soek na sneeu. Ek is nie een vir koue nie, maar ek glo ook mens moet ALLES ten minste een keer probeer. So, ek gaan nog een keer Europa toe in die winter om te gaan “snowboard”. Sal die ski maar eers ‘n mis gee, dit lyk makliker om te “snowboard”

Weet nie wat gaan ek aantrek om warm genoeg te bly nie, want ek HAAT baie klere aantrek. En as ek nooit hoef skoene te dra nie, sal dit ook nog te gou wees. Somer of winter, dit waai eerste as ek by die huis kom. Ek het sulke katjie slippersokkies wat ek in die winter dra, is amper soos kaalvoet. Hulle is ook nou al gedaan – wil iemand nie vir my ander brei nie?

Anyway, ek dwaal af. Ons is oor die berg Worcester toe en toe Touwsrivier toe, maar daar was net so klein bietjie sneeu nog bo-op die berge.  By Touwsrivier wou ons ontbyt eet, en al wat ons toe kon kry is ‘n restaurant by ‘n BP vulstasie, wat maar bietjie ‘shady’ gelyk het van ver af. Draai toe maar daar af en besluit om eers net in te loer. Was ek nou aangenaam verras.

Dis ‘n plekkie waar mens nog regte boere ontbyt kry, met alles vars en die HEERLIKSTE konfyte. Jy kan ook tuisgemaakte koekies, konfyt en ingelegde lekker goete daar koop. Daar is selfs ‘n paar oornag kamers en chalets. En daar is die mooiste hout kershouers op die tafels, wat iemand plaasliks vir die restaurant gemaak het.

Sien my link:  http://www.cyberm.co.za/komkyk.htm

Dit bewys weer my punt – beproef alles. 

En van beproef alles gepraat – begin Julie gaan ek bungi spring by Tsitsikama. Dis vrek hoog – ek was al daar, maar het nie die moed gehad om te spring nie. Ly nog boonop ook aan hoogtevrees, maar mens moet jou “demons face”! Nou GAAN ek. Tot dan toe gaan ek moed bymekaarskraap, want dié keer draai ek nie om nie – my reputasie is op die spel!

Hoekom Sonkind?

Hoekom Sonkind? Want ek kan nie sonder die son nie. In die winter moes ek ‘n beer gewees het wat in ‘n gat kon kruip en eers weer uitkom as die swaeltjies terugkom en die seisoen terugdraai. Ek het al baie gewonder of dit iets te doen het met die tyd van die jaar wanneer mens gebore is. Ek is amper in die middel van November gebore, in Worcester, so ‘n lekker WARM Bolandse dorp.

Miskien is dit hoekom ek nie krag vir die winter het nie. In die winter kom sit daar so ‘n lelike donker man met ‘n lang swart jas, met ‘n donker kap, sodat jy nie sy gesig kan sien nie, in my kop. Ek raak so bietjie af as die reën te baie dae aanhou, het al my voete gestamp en na Bo geskree “dis nou GENOEG reën, ASSEBLIEF!”

Wonder ook of ek daaroor gestraf sal word, want al raak ek so obstroppolis oor die reën, is ek nogal gelowig. Ek is heeldag in gesprek met die Here, ek glo nie daaraan om Hom te bêre net vir bid of kerk nie. Soms sê ek sommer so in die middel van ‘n ding dankie vir my seëninge of iets spesiaals. Dus wonder ek of Hy kwaad raak as ek so opstandig is oor die weer, wat mos eintlik van Bo af kom.

Maar wag, ek dwaal af, iets wat ek nogal goed doen op ‘n gereelde basis! Wat ek wou weet, daar is mens wat MAL is oor die winter (ek is MAL daarvan!). Nou wil ek weet; is daardie mal-oor-die-winter-mense dalk in die winter gebore? Hoekom maak winter party mense “happy” en ander “crappy”?

Groete uit ‘n koue Kaap tot later.